रंग

 #रंग 

बाळपणीचे रंग मनोहर,

कॅन्व्हास तयांना भिंतींचा;

उभ्या-आडव्या रेघोट्यांतून,

अट्टाहास बोबड्या चित्रांचा...

कौमार्याचे रंग कोवळे,

आनंदाचे सडे चहूकडे;

जिज्ञासेच्या कुंचल्यातूनी,

प्रश्नांचे फटकार उडे....

भुलवी किशोरा, रंग अबोली,

भवताल टिपी, टीपकागदापरी;

गडद-फिक्याच्या छटा साधूनी,

निसर्गनक्षी चितारी पटलावरी....

मार्गे क्रमिता त्या खुणवी निळाई,

विस्तीर्ण नभे अन् सागर-गहराई;

स्वत्व शोधण्या पंख पसरूनी, 

अवकाशा कवेत घेऊ पाही....

स्थिरावलेल्या मना कधी मग,

भुलवी गुलाबी, रंग प्रितीचा;

निळ्या-पिवळ्याचे सोयर होता,

सृजनगंध दरवळे हिरव्या मातीचा....

दोन ध्रुवांवर, फिरूनी बाळपण, 

रंग सात तरी धवलची वास्तव;

न्हाते पूर्वा अरूणिमेने तर,

शांत पश्चिमा क्षितीजी अरुणास्तास्तव....

@अर्चना खिस्ती-गोरकर.....